Moshi, Tanzania – 29
November
Van Pangani aan die kus vertrek ons na die binneland op die
besige noordelike toeriste roete. Op
hierdie roete is die berg Kilimanjaro, die Ngorongoro krater en Serengeti.
Oppad moet ons omtrent koes vir die Tanzaniese busse wat die
locals vervoer. Een bus ry amper die
bakkie se regter spieeltjie af!
Moshi is ‘n pragtige dorp aan die voet van Kilimanjaro. Die weer is heerlik koel na die bedompigheid
van die kus. Ons kamp by die Honey
Badger, net ‘n paar kilometer voor die dorp.
In Moshi is ‘n Indiese winkelgroep waar ons kruideniersware koop – weer
op die maat van Boney M se kersfees cd.
Kilimanjaro – ons sien die hoogste berg (5895m) in Afrika so
50km voor Moshi. Die bopunt is toe onder
wolke. Teen 18h00 die aand is ‘n klein
stukkie oop en ons neem foto’s. Ons
staan die volgende oggend vroeg op want die locals vertel dat dit die beste tyd
is om die berg in sy volle glorie te sien, maar die bopunt kruip nou heeltemal
weg onder die wolke... Ons gaan maar ‘n
poskaart koop!
Oral in Tanzania, maar veral in die Noorde, verkoop die
locals rooi uie en tamaties langs die pad.
Aartappels, komkommers en green peppers kan op sommige markte gekoop word,
as dit daar naby geplant word.
Ngorongoro krater – 30 November
Ons ry van Moshi na
Arusha, so 80km verder. Arusha is `n
groot toeriste dorp met ‘n lughawe. Of
jy nou Kilimanjaro wil klim of die Serengeti besoek, jy sal een of ander tyd by
Arusha draai. Van hier neem safari
voertuie die toeriste na hul bestemmings.
Safari voertuie is Land Cruisers wat omskep is om 2 tot 6 passasiers te
vervoer. Elke voertuig het ‘n gids wat
na die toeriste omsien – vervoer, verblyf en etes. Ons het nie besef dat dit so ‘n groot
besigheid is nie. In Ngorongoro en die
Serengeti vind die Tanzaniers dit vreemd dat ons met ons eie voertuig ry. Die plekke is ook nie ingerig vir toeriste
wat selfversorgend is nie. Daar is geen
winkels of restaurante by die hoofkampe nie.
Niks. Alle etes en verblyf in
tente word voorsien deur die safari voertuie en dit word van Arusha
gebring. Daar is ook toeriste wat
verkies om in lodges in die parkte te bly.
Die safari voertuie neem al hierdie toeriste (van die kampe en die
lodges) op wildsritte. Dis glad nie soos
die Kruger Wildtuin nie!
Vandat ons Arusha uitry begin ons Maasai mense sien wat in
hul rooi klere troppe beeste oppas in oop grasvelde langs die pad. Hulle is ‘n half nomadiese volk wat
rondbeweeg tussen Tanzania en Kenia deur die Serengeti en Maasai Mara
Wildsparke.
Die Ngorongoro toegangsgeld moet by ‘n bank in Arusha
inbetaal word, want kontant word nie by die ingangshek aanvaar nie. Die toegangsgeld is $400 (R3600)! Dit sluit in $200 om die krater te besoek,
$60 om te kamp en $140 vir die permit wat geldig is vir slegs 24 uur. Dis ‘n stywe klompie geld, maar ons byt vas
– ons is dan nou hier.
Ons kamp die aand in die Ngorongoro publieke kampterrein,
Simba A. Simba beteken “leeu” in Swahili
(die amptelike taal in Tzn en Kenia). Die kamp is
glad nie omhein nie en omdat dit so hoog geleë is (ongeveer 2300m bo seespieel),
is dit koud – ons dra sweetpak tops! Die
kampterrein het ‘n pragtige grasperk, maar voertuie mag nie daarop staan nie, slegs
tente. Ons slaap in die daktent en moet
dus op die grondpad parkeer, op die rand van die kamp. Die kampplek het net Oosterse toilette – hurk
toilette – wat heel goed werk, behalwe dat die beenspiere lekker styf is die
volgende oggend! Dis baie vreemd dat
hier net Oosterse toilette is, want daar was nie een Oosterse kampeerder nie?!?
Teen skemer, net toe ons wil begin met die kos, duik twee
groot olifante naby ons op. Hulle het
rustig verby gestap. Ons was maar lekker
benoud! Net voor ons gaan slaap, sien
ons ‘n hiëna. In die nag, vroegoggend, hoor
ons ‘n harde gekouery. Toe ons uitkyk is
dit ‘n buffel wat gras vreet tussen ons tent en die badkamer! Ons hoor ook leeus in die verte... Daardie nag slaap ons maar lig. Dankbaar vir 'n daktent!
Ons vertrek 6h30 die oggend na die krater. Die pad daarheen loop deur ongelooflike groen
velde waar Maasai woon en hul vee hou.
Ons is veronderstel om ‘n gids saam te neem in die krater, maar daar is
nie plek in die bakkie nie. Gelukkig is
dit ook nie werklik nodig nie, want die krater is nie so groot nie (‘n deursnee
van 20km en ‘n kraterrant van sowat 600m).
Soek net die safari voertuie en jy weet waar die leeus is!
Die krater is ongelooflik.
Ons spandeer omtrent 6 ure daarin en sien baie wildebees, zebras,
Thomson gazelle, Grant gazelle en 10 leeus.
Ons moet jaag om by die hek te kom voor die 24 uur
verstryk. Die pad is baie sleg – dis
sinkplaat, maar baie dieper. Na 'n gejaagery op die sinkplaat begin die Hilux siek klink. Erens is 'n skroef los. Ons draai maar om en gaan terug suid om die fout te soek....
No comments:
Post a Comment